Auf wiedersehen von Inge!

En so het dit nou tot 'n einde gekom. Na maande se beplanning, voorbereiding en opgewondenheid is ons avontuur nou verby. Dankie aan almal wat hierdie ervaring vir ons moontlik gemaak het. Dis was 'n absolute plesier om saam met Anja en Lodie te reis en ek hoop dat ons al 6 in die nabye toekoms saam so iets kan doen! Dankie vir julle almal se bydrae tot my groeiende doppie versameling! Uit Afrika het julle saam 'n whopping 128 doppies vir my terug gebring. Heitou! Ek weet ek moet eintlik net een foto opsit, maar danksy julle het ek nou 'n deeltjie van 9 lande by my en ek wil dit ook met julle deel:

Vlnr: Annami (Kenya & Etiopië), Marizanne (Etiopië & Soedan) en Lizelle (Soedan & Egipte)

Ek was in 16 dae deur 6 lande...ons het dus bittermin tyd gehad om vriendskappe met mense of plekke aan te knoop. As ek terug dink aan my deel van die toer is daar een oomblik wat vir my alles so mooi opgesom het. Dis die foto van die oulikste klein dogtertjie suid van die Sahara. Thuli. In twee dae het hierdie aktrise dogtertjie (van Bongo Camping in Tanzanië) vir my Afrika opgesom: arm, pragtig, kultuurryk, taal verskille, toerisme, liefdevol met 'n reine hart. As ek aan my deel terug dink dan sien ek hierdie gesiggie wat vir my opkyk met haar handjies propvol lewendige sprinkane...




PS: Hierdie klein dingetjie in die feetjierok het dit reg gekry om my op kamera handeviervoet te laat staan en soos 'n leeu te brul. Sy is spesiaal...